VENRES 16 DE XULLO ÁS 22.30 HORAS
Venres 16 de xullo do 2010
O Verán Cultural 2010 continúa o venres 16 de xullo ás 22.30 horas na Praza do Concello con Omar Percussion Group. Esta banda presenta 'VIDA', un espectáculo musical con máis de 70 instrumentos e xogos de luces co que os espectadores poderán encherse de enerxía e moito ritmo. Auga, vento, lume e terra, os catro elementos fundamentais, exprésanse a través de estilos como a música chill out, que representa o vento, a música española, que recorda a auga, melodías xaponesas transmítennos a terra e a música africana que nos achega ao lume. Este grupo, un dos máis significativos da percusión contemporánea, está integrado por tres músicos profesionais que en 2004 se xuntaron para explorar novas posibilidades creativas mesturando composicións propias coas obras de grandes compositores creando unha calidade de son única e persoal, con especial interese na música étnica e multicultural. Este espectáculo conta coa colaboración da Deputación da Coruña.
A DEPUTACIÓN TEN INVESTIDO 10 MILLÓNS NO MUNICIPIO NESTE MANDATO
Xoves 15 de xullo do 2010
As obras para a construción dunha nova escola infantil para a capital municipal carballesa, que se edificará no entorno da urbanización de Riotorto na estrada de Razo (na imaxe), comezarán antes de que remate 2010. Así o anunciou o Vicepresidente da Deputación, o nacionalista Pablo Villamar, nunha visita institucional ao Concello de Carballo. O organismo provincial achegará 550.000 euros para sacar adiante a actuación. Así mesmo, e tamén antes de finais de 2010, está previsto que principien os traballos da primeira fase de urbanización da travesía de Sísamo, unhas obras que xa están adxudicadas á empresa OVIGA SL e que contan un orzamento próximo aos 600.000 euros. Villamar asegurou que tamén se axilizará a adxudicación dos traballos da segunda fase de mellora, que afectaría ao treito que transcorre entre o punto quilométrico 0,730 e a escola unitaria de Sísamo, de tal xeito "que podería chegar a traballarse nas dúas fases ao mesmo tempo". Villamar estivo acompañado polo deputado Xoán Sande e foi recibido no Concello polo Alcalde, Evencio Ferrero; o Tenente de Alcalde, José Antonio Viña; e o Concelleiro de Obras, Luís Lamas.
UN TOTAL DE 70 PERSOAS REFLEXIONAN SOBRE CREATIVIDADE E LINGUA
Mércores 14 de xullo do 2010
O Pazo da Cultura acolle até o venres 16 de xullo o VI Curso de verán sobre Dinamización Lingüística da Universidade da Coruña (UDC), que este ano aborda "a importancia da lingua nos espazos de lecer", en verbas do responsable de Normalización Lingüística da Deputación, Xoán Sande Muñiz, así como "a relación das políticas lingüísticas e culturais", segundo Goretti Sanmartín, directora do Servizo de Normalización Lingüística da UDC. Ambos os dous estiveron no acto de apertura deste curso que pretende debater e sacar conclusións acerca da creatividade para a lingua coa axuda dunhas 70 persoas, entre participantes e relatores. Así, "a cultura é un espazo axeitado e singular para incluír prácticas e medidas a prol da lingua galega", subliña Sanmartín. No acto de apertura do VI Curso de verán sobre dinamización lingüística tamén estiveron presentes Nel Vidal, presidente da Coordinadora de Traballadores/as de Normalización da Lingua (CTNL) e o Alcalde de Carballo, Evencio Ferrero.
MÉRCORES 14 E XOVES 15 DE XULLO
Martes 13 de xullo do 2010
A programación do Verán Cultural continúa esta fin de semana despois de principiar o 9 de xullo cun concerto infantil no que os cativos e cativas se achegaron á Praza do Concello. Agora a oferta ábrese aos adultos con propostas nas que hai teatro de rúa, cine e música. Así, o mércores 14 de xullo ten lugar o espectáculo 'Romería a Santiago' de Masca Teatro-Aula Unam de México, que presentan unha proposta de teatro popular itinerante que percorre a historia das peregrinacións a Santiago. Actores, cabezudos, máscaras, monicreques ou zancudos transportarannos ao sentir do peregrino e ao espírito de festa e devoción desta tradición desde a perspectiva da cultura mexicana. A cita é a partires das 20.30 horas nas rúas peonís e na Praza do Concello e conta coa colaboración da Sociedade Estatal de Conmemoracións Culturais e Xacobeo 2010. O xoves 15 é a quenda para a música galega de Sés, unha descarga de ritmos e sons que conta coa voz da carballesa María Xosé Silvar. A cita é de balde, no Pazo da Cultura, a partires das 22.00 horas.
ENTRE O MÉRCORES 14 E O VENRES 16 DE XULLO
Martes 13 de xullo do 2010
A Universidade da Coruña (udc), en colaboración co Concello de Carballo, a Coordinadora de Traballadores/as de Normalización da Lingua (CTNL) e a Deputación da Coruña, organizan a sexta edición do curso de verán sobre dinamización lingüística, que ten lugar no Pazo da Cultura de Carballo os días 14, 15 e 16 de xullo e que se centra na análise e debate da promoción social da lingua nos espazos de lecer e nas accións culturais. No curso participan 70 persoas do ámbito da normalización lingüística, tanto de entidades públicas como do ensino ou de entidades privadas. Os obxectivos desta edición da acción formativa que desde o ano 2008 se desenvolve en Carballo son reflexionar sobre a vinculación entre política lingüística e política cultural, analizar os elementos de política lingüística que se teñen en conta nas accións culturais, avaliar as accións relacionadas coa cultura que se utilizan nas políticas lingüísticas e presentar accións para a normalización e a dinamización lingüísticas que teñan como obxectivo intervir nas actividades e nos espazos de lecer. Para isto, combinaranse sesións teóricas e prácticas, formativas, de análise e de traballo conxuntos con relatorios, grupos de traballo, presentacións de experiencias, obradoiros e mesas de debate.
TAMÉN ESTIVO EN PONTE LUBIÁNS E VILARDEFRANCOS
Luns 12 de xullo do 2010
O Director Xeral de Patrimonio Cultural da Xunta de Galicia, Xosé Manuel Rey Pichel, vén de visitar Carballo para coñecer e examinar de primeira man algúns dos puntos máis emblemáticos do municipio, como son a Ponte Lubiás, o carballo e o Pazo de Vilardefrancos e o Dolmen de Pedra Moura, que formará parte do Parque do Megalistismo. O carballés Rey Pichel falou especialmente do dolmen de Aldemunde, "porque hai que poñelo en valor e protexelo coas medidas axeitadas", desde "un profundo sentido cultural e con respecto", realizando un "tratamento especialmente delicado". No proxecto está recollida unha rehabilitación en dúas fases: unha primeira de recuperación, delimitación e acondicionamento, que inclúe a expropiación de terreos para poder actuar na zona e a creación dunha área de aparcamento e de lecer; e unha segunda de escavación, máis centrada no estudo e recuperación do patrimonio megalítico.
O SÁBADO 17 DE XULLO CON SAÍDA E CHEGADA NO PAZO DA CULTURA
Xoves 8 de xullo do 2010
O sábado 17 de xullo pola tarde Carballo converterase nunha festa do ciclismo coa celebración dos Campionatos Galegos de Fondo en Estrada 2010, que contarán coa participación duns 140 corredores e corredoras de categorías cadete, feminina e júnior. O Club Ciclista Carballo-Placasa e a Federación Galega de Ciclismo, coa colaboracion do Concello e de Conservas Calvo, organizan esta cita da que xurdirán até cinco campións galegos. As probas para as distintas categorías divídense en dúas carreiras nun circuíto de preto de 20 quilómetros que esixirá 3 voltas para os cadetes masculinos e as cadetes e júnior femininas para un total de 57,3 quilómetros; e cinco voltas para percorrer 95,5 quilómetros no caso das categorías elite feminina e júnior masculina. Dende a organización fan un chamamento aos veciños e veciñas para que se acheguen a desfrutar do espectáculo do ciclismo nun percorrido "aberto ás sorpresas" e "seguro que con moita batalla", en verbas do Presidente da Federación Galega de Ciclismo, Sabino Cortizo.
VENRES 9 DE XULLO ÁS 22.00 HORAS
Mércores 7 de xullo do 2010
O programa do Verán Cultural 2010 arrinca en Carballo cun espectáculo dedicado por completo ao público infantil. Así, un dos grupos galegos de máis éxito entre os dedicados a compoñer para os máis cativos e cativas propón un divertido e participativo concerto destinado ao público familiar no que presentan o seu quinto disco, 'Patatín patatán'. É un concerto para escoitar e tamén para cantar, moverse e bailar con cancións populares que moitos adultos tamén escoitaron seguramente de pequerrechos. Pero tamén é unha oportunidade para vivir cantos que chegan a nós dende o mundo da televisión ou da Internet. Todo, mesturado cos xogos poéticos e as pezas do folclore que tamén caracterizan a este grupo que xa conta con dez anos de vida. A cita é o venres 9 de xullo a partires das 22.00 horas na Praza do Concello e a entrada é de balde. Colabora neste espectáculo a Deputación provincial da Coruña.
CARBALLO: ÚNICO CONCELLO DA COSTA DA MORTE CON TRES ENSEÑAS
Luns 5 de xullo do 2010
A Bandeira Azul, un distintivo que concede a ONG Asociación de Educación Ambiental e do Consumidor (ADEAC), xa ondea nos areais das Saíñas, Pedra do Sal e Razo. Nos últimos anos viñan sendo as dúas últimas praias as que contaban coa bandeira, pero finalmente agora uniuse por primeira vez a das Saíñas (na imaxe), co que en tres dos areais do termo municipal ondeará o distintivo este verán, sendo o único municipio da Costa da Morte que conta con tres bandeiras azuis. Este símbolo recoñece a calidade dos areais, así como a súa limpeza e os servizos que ten dispoñibles, como o de socorrismo. O Alcalde de Carballo, Evencio Ferrero, recolleu as bandeiras o sábado 3 de xullo en Sanxenxo a primeira hora da mañá, nun acto no que se repartiron as enseñas de toda Galicia. Hoxe, acompañado do Concelleiro de Praias, Benedito Viña, e de socorristas e membros de Protección Civil, procedeuse ao seu izado nun percorrido polos tres areais que comezou nas Saíñas e rematou en Razo.
DO 9 DE XULLO AO 28 DE AGOSTO
Xoves 1 de xullo do 2010
O programa do Verán Cultural 2010 continúa un ano máis, e xa van doce edicións, coa arela de converterse nunha proposta para o tempo de lecer do estío non só para os veciños e veciñas, senón para os visitantes da vila. Segundo a Concelleira de Cultura, Belén Lendoiro, "preséntase unha oferta diversa, de calidade, con caracter gratuíto e co obxectivo de fomentar a participación da xente". A grande maioría das propostas están plantexadas para desenvolverse ao aire libre, especialmente na Praza do Concello, e céntranse na variedade musical con sons tradicionais e tamén orixinais como a cumbia, o blues, o chill out, ou o pop e indie do Festival Sereas e Piratas. Pero tamén nas esperadas citas de maxia e de teatro, cunha programación para os máis cativos e cativas e coa xa tradicional cita en agosto da Praza dos Libros. Así mesmo, continúa o ciclo Noites de cine, e celebrarase a VI edición do Curso de Verán sobre Dinamización Lingüística da Universidade da Coruña. Un programa completo entre o 9 de xullo e o 28 de agosto.
A CITA É NO CIRCUÍTO DE MOTOR DE BÉRTOA
Mércores 30 de xuño do 2010
A fin de semana do 2, 3 e 4 de xullo o Circuíto de Motor de Bértoa acolle a celebración dunha proba do Campionato de España de Autocross, a segunda deste tipo que se celebra en Carballo despois de que o circuíto tamén fora o escenario dunha proba desta competición o ano pasado. Están xa inscritos un total de 104 pilotos, o que supera a participación da edición anterior, cunha ampla presenza de competidores de Carballo e da Costa da Morte, que supoñen aproximadamente un 20 por cento dos pilotos que tomarán a saída na proba. Así mesmo, cóntase coa presenza das escudarías Bergantiños Motor, Autocross Arteixo e Vidal Racing de Vimianzo, ademais da organizadora da proba, Escudaría Coruña, a través das cales se canaliza a participación local. O Concelleiro de Deporte, Marcos Trigo, quixo subliñar a importancia de que o Circuíto de Bértoa acolla unha proba deste tipo por segundo ano consecutivo, o que demostra a versatilidade do circuíto e a variedade de carreiras que pode acoller.
XANEIRO FOI O PERÍODO CON MÁIS DEMANDAS
Martes 29 de xuño do 2010
Ao longo do primeiro semestre de 2010 o Concello ten recibido un total de 724 avisos acerca de demandas cidadáns dos veciños e veciñas. O mes que ten rexistrado un maior número de peticións é o de xaneiro, con 186 avisos, seguido de marzo, con 141. Os interesados e interesadas poden denunciar as deficiencias ou demandar os arranxos que consideren oportunos en materias como os sinais informativos ou de tráfico; os servizos básicos de augas, electricidade ou recollida de lixo; os asuntos relacionados con Carballo Limpo; os equipamentos dos edificios municipais, o mobiliario urbano ou as instalacións deportivas; a limpeza de espazos públicos; a mellora da rede viaria ou o alumeado público. Precisamente os arranxos ou as substitucións das lámpadas dos farois situados por todo o municipio son as peticións máis demandadas polos cidadáns, con 386 no primeiro semestre. A Brigada de Obras é a encargada de xestionar estas peticións, que calquera carballés ou carballesa pode realizar a través do número de teléfono 981 704 700 ou ben no correo electrónico <infocarballo@carballo.org>.
.jpg)