EN DECEMBRO ARRANCARÁN OS CURSOS DE PROGRAMACIÓN DE SISTEMAS INFORMATICOS E SERVIZO DE BAR E CAFETERÍA

O alumnado do obradoiro de emprego deseñará e fabricará o mobiliario urbano para varias rúas

Doce mozos/as de 18 a 30 anos están a formarse no Fórum Carballo na especialidade de carpintería de madeira

Mércores 29 de novembro do 2017

No obradoiro de carpintería hai 11 alumnos e 1 alumna

O alumnado do obradoiro de emprego de Revalorización de espazos urbanos deseñará e fabricará o mobiliario para algunhas das rúas que van ser obxecto de obras de reurbanización nos próximos meses. Bancos, cubre-contedores, paneis informativos... diversos elementos urbanos que permitirán completar os proxectos urbanísticos cun plus de calidade e cun deseño totalmente propio. “Estamos a facer unha proba do banco a escala 1/1 para que o valoren os servizos técnicos do Concello, e que tanto eles como o propio alumnado poidan aportar as súas ideas”, explica Andrés Seoane, director do obradoiro.

Todo o mobiliario será de madeira, pero tamén se empregará aceiro, polo que o obradoiro de emprego traballará en colaboración co curso AFD de soldadura que tamén se está a desenvolver nas instalacións do Fórum. A maiores, o alumnado do obradoiro fabricará tamén mobiliario para completar o equipamento do novo centro social de Ardaña.

O obradoiro desenvolverase ata o 28 de marzo

Carballo acolle por primeira vez un obradoiro de emprego para mozas e mozos sen emprego e inscritos no ficheiro do Sistema Nacional de Garantía Xuvenil. Son 11 alumnos e 1 alumna, tod@s do municipio carballés, teñen idades comprendidas entre os 18 e os 30 anos (a media é de 26) e carecían de experiencia previa no sector. 

Nestes momentos están a traballar no taller de carpintería do Fórum, despois de formarse en prevención de riscos, igualdade de xénero e sensibilización ambiental, e de realizar varias visitas formativas a empresas de referencia no sector. O 28 de marzo do 2018 completarán os seis meses de duración desta acción formativa.

Cursos AFD

Para desempregados/as van dirixidos tamén os dous cursos AFD que están en marcha xa nos talleres de soldadura e electricidade do Fórum. En total hai 42 persoas formándose nestes momentos no complexo carballés. E o mes que vén incorporaranse outros 30, porque en decembro arrancarán os cursos de Programación de sistemas informáticos (608 horas) e Servizos de bar e cafetería (658 horas). Hoxe remata o prazo para que os profesionais interesados en impartilos presenten as solicitudes, e as persoas que queiran asistir como alumnos/as poden inscribirse xa na Oficina de Emprego, situada na planta baixa do Fórum, para participar no proceso de selección que se convocará en breve.