.jpg)
Recepción no Concello de Carballo á elite galega do autocross
Evencio Ferrero recibiu ao campión de España Alberto Lorenzo, aos campións galegos Dani Castro e Javier Ramilo e ao presidente de Máis Motor, campioa de escuderías
Martes 7 de decembro do 2021
De esquerda a dereita, Dani Castro, Alberto Lorenzo, Evencio Ferrero, Javier Ramilo, Juan Puga e Marcos Trigo
Carballo é unha potencia en autocross, pero poucas veces o nome do noso concello aparece no máis alto do podio de todas as categorías do campionato galego. Esta temporada conseguímolo, e hoxe o alcalde, Evencio Ferrero, e o concelleiro de Deporte, Marcos Trigo, quixeron agradecer e visibilizar o gran traballo desenvolvido polos pilotos locais ofrecéndolles unha recepción na Casa do Concello.
Alberto Lorenzo, que hai só dous anos deu o salto de karting a carcross, vén de proclamarse campión de España de autocross na categoría de promoción. O novo piloto de Razo competiu nun Kincar coa escudería local Máis Motor.
Da mesma escudería é Dani Castro, un habitual da categoría de +1.600, que despois de varios subcampionatos, esta tempada logrou situarse no máis alto do podio.
Outro carballés, Javier Ramilo, “Kobas”, fixo dobrete ao proclamarse campión galego de carcross e de rallymix ao volante dun Ya-Car con moi poucos días de diferencia.
E ademais dos éxitos individuais, Máis Motor proclamouse por segunda temporada consecutiva campioa galega de escuderías de autocross. E, para completar o podio, outro corredor da escudería carballesa, o larachés Álvaro Freire, é o campión galego en -1.600.
O presidente de Máis Motor e os pilotos asinaron no Libro de Honra
Na recepción de hoxe, os tres pilotos carballeses e o presidente de Máis Motor, Juan Puga, asinaron no Libro de Honra do Concello de Carballo, e recibiron os parabéns tanto de Marcos Trigo coma de Evencio Ferrero, quen asegurou é unha satisfacción “ver que o nome de Carballo sae recoñecido” e que o Circuíto Municipal do Motor “serve para promover o deporte e para que os pilotos locais esteades implicados, competindo, dando exemplo e ademais gañando”.