Inicio Carballo ao día Novas

Novas


Formulario de busca
O debate sobre o solo industrial pecha o foro socioeconómico en Carballo

OBSERVATORIO LOCAL

O debate sobre o solo industrial pecha o foro socioeconómico en Carballo

Mércores 13 de xullo do 2005

O Observatorio económico local de Carballo celebra unha mesa de traballo sobre o solo industrial, o mércores 13 de xullo a partir das 18.30 horas. Na reunión exporanse as principias liñas estratéxicas de actuación para a promoción deste sector recollidas no documento Desenvolvemento de solo industrial na Costa da Morte: liñas estratéxicas de actuación. Ao comezo da reunión intervirá o concelleiro delegado de Urbanismo, Obras e Desenvolvemento rural, Manuel Andrade Cristóbal.

O Concello recibe 20.000 euros para o Conservatorio Municipal

ENSINO

O Concello recibe 20.000 euros para o Conservatorio Municipal

Martes 12 de xullo do 2005

O Concello vén de recibir unha subvención da Deputación da Coruña por un total 20.000 euros, o importe máximo establecido na convocatoria destinada a conservatorios e escolas de música de titularidade municipal para o ano 2005. O obxectivo desta axuda é o de colaborar co Concello "na súa tarefa de promoción e de difusión da música, ao lle permitir que continúe ofrecendo esta formación de calidade".

Expertos e profesionais debaten sobre a dinamización do turismo na Costa da Morte

OBSERVATORIO ECONÓMICO

Expertos e profesionais debaten sobre a dinamización do turismo na Costa da Morte

Martes 12 de xullo do 2005

O Observatorio Socioeconómico de Carballo, promovido pola Cámara de Comercio da Coruña a través da súa Antena Local, celebra unha mesa de traballo sobre o sector turístico. Na reunión intervirán o concelleiro delegado de Medio Ambiente, Turismo e Xuventude, Manuel Luis Pan, e o xerente do Plan de Dinamización Turística da Costa da Morte, Ignacio Fernández Dosil.

O Concello ultima un regulamento que incentiva a colaboración veciñal coa administración

PARTICIPACIÓN CIDADÁ

O Concello ultima un regulamento que incentiva a colaboración veciñal coa administración

Luns 11 de xullo do 2005

O borrador do novo Regulamento de Participación cidadá introduce importantes melloras na integración dos veciños nas xestións do Concello. O obxectivo do texto é aproximarlles a administración aos cidadáns, mellorar a transparencia, fomentar o asociacionismo e favorecer a descentralización e a eficacia nas xestións. "É no nivel local onde o dereito á participación pode ser mellor exercitado, e onde é máis fácil a evolución da democracia representativa cara á democracia participativa", sinálase no texto, que se vai debater na próxima Comisión informativa xunto coas alegacións que presenten os grupos municipais.

Carballo deseña a estratexia de promoción da súa actividade emprendedora

OBSERVATORIO ECONÓMICO

Carballo deseña a estratexia de promoción da súa actividade emprendedora

Luns 11 de xullo do 2005

O Observatorio Económico Local de Carballo celebra a segunda rolda de reunións con expertos e profesionais sobre a definición das liñas estratéxicas de promoción das áreas nas que se vai centrar: a actividade emprendedora, o sector turístico e o solo industrial. As mesas de traballo, nas que intervirán representantes do Concello, desenvolveranse dende o luns 11 ao mércores 13 de xullo, todas a partir das 18.30 horas.

O Concello obtén a autorización para acondicionar as zonas de Razo e Baldaio

MELLORAS NAS PRAIAS

O Concello obtén a autorización para acondicionar as zonas de Razo e Baldaio

Venres 8 de xullo do 2005

Carballo recibiu a autorización da Consellaría de Medio Ambiente para o seu proxecto de acondicionamento dos accesos dos areais de Razo e Baldaio. O concelleiro delegado de Servizos e Mantemento, Lois Lamas, valorou positivamente este informe e sinalou que os traballos de acondicionamento van comezar de inmediato.

Sométese a información pública o proxecto de ampliación do polígono industrial

EMPRESAS

Sométese a información pública o proxecto de ampliación do polígono industrial

Venres 8 de xullo do 2005

O proxecto de ampliación do polígono industrial de Carballo exponse ao público durante o prazo dun mes dende o venres 8 de xullo. O futuro parque empresarial estará localizado a carón do actual polígono, ocupando unha extensión de 730.000 metros cadrados de superficie, dos que 438.000 están tipificados como solo útil. Esta cifra sumaríaselle aos 520.000 metros cadrados que ocupa o actual polígono.

Comezan os traballos para habilitar o campo da feira da Milagrosa

OBRAS

Comezan os traballos para habilitar o campo da feira da Milagrosa

Xoves 7 de xullo do 2005

O Concello iniciou os traballos para habilitar a zona do campo da feira da Milagrosa, na que se vai instalar a futura Casa dos Oficios. A Xunta de Goberno Local aprobou, durante a súa reunión ordinaria do 7 de xullo, a adxudicación da obra de demolición das construcións que existen nesta zona.

Adxudicados novos proxectos de saneamento para seis parroquias do rural

NOVA REDE DE SUMIDOIROS

Adxudicados novos proxectos de saneamento para seis parroquias do rural

Mércores 6 de xullo do 2005

O Concello comezará cos proxectos de saneamento das parroquias de Razo, Cances, Lema, Rebordelos, Rus, Sísamo e Sofán, que se incluíron este ano no Plan Operativo Local. A adxudicación destes proxectos, por parte da Deputación da Coruña, significa un salto cualitativo moi importante na mellora dos servizos das zonas rurais do Concello. O investimento total que se vai facer para a realización destes traballos supera os 700.000 euros.

Mercedes Peón presenta en Carballo ‘Ajrú’, o seu segundo disco

CONCERTO

Mercedes Peón presenta en Carballo ‘Ajrú’, o seu segundo disco

Martes 5 de xullo do 2005

Mercedes Peón estará en Carballo o venres 8 de xullo para presentar o seu segundo disco Ajrú. O concerto encádrase no ciclo As nosas músicas que patrocina a Obra Social de Caixa Galicia, coa que colabora o Concello dende hai varios anos. A cantante "é un exemplo de vangarda, de música pegada á terra pero anovadora á vez", segundo explicou o alcalde, Evencio Ferrero, na presentación da actuación que tivo lugar o martes 5 de xullo. O concerto será na Praza do Concello a partir das 22.30 horas.

Maxia, folk, cine, rock e jazz internacional centran a oferta cultural de Carballo

VERÁN CULTURAL

Maxia, folk, cine, rock e jazz internacional centran a oferta cultural de Carballo

Luns 4 de xullo do 2005

A concelleira de Cultura, Belén Lendoiro, presentou a programación cultural para os meses de xullo e de agosto. Na elaboración deste plan buscouse o equilibrio entre as diferentes idades e intereses dos veciños de Carballo. Deste xeito, inclúese no programa música folk, jazz, blues, rock, maxia, teatro infantil, exposicións culturais, as noites de cine, a tradicional feira do libro e a actuación dos grupos de rock locais. Comezará coa actuación de Mercedes Peón, o venres 8 de xullo, para presentar o seu segundo traballo Ajrú. O concerto está patrocinado por Caixa Galicia.

As instalacións culturais do Concello aplican os horarios de verán

NOVOS HORARIOS

As instalacións culturais do Concello aplican os horarios de verán

Venres 1 de xullo do 2005

As instalacións culturais do Concello comezan a aplicar os horarios de verán a partir do 1 de xullo. O obxectivo é o de acomodar os servizos culturais que se ofrecen aos novos hábitos dos cidadáns da comarca durante os meses de xullo e agosto. Os rapaces terán a posibilidade de aproveitar os días sen clases para participar nas actividades da Ludoteca Municipal e todos aqueles que gocen das vacacións estivais poderán acceder á oferta cultural do Museo de Bergantiños, da Aula de Informática ou do Pazo da Cultura, en horarios que se adaptan mellor ao seu tempo libre.

Compartir: