Xornada de portas abertas na Escola Municipal de Hostalaría para as familias do alumnado do curso de cociña

Na xuntanza participaron o alcalde e membros do goberno municipal, o persoal municipal do Fórum e o obradoiro de carpintería

Venres 20 de decembro do 2019 Carballo ao día

O alumnado de cociña da Escola Municipal de Hostalaría superou hoxe a súa primeira proba con público, e ademais cun público moi especial, porque estivo integrado por familiares dos alumnos e as alumnas que se están a formar co equipo de profesionais dirixidos por Fernando Agrasar.

A escola decidiu organizar unha xornada de portas abertas antes de iniciar as vacacións de Nadal para que pais, nais, parellas, fillos, fillas e outras persoas achegadas puidesen coñecer as instalacións nas que se estamos formando a 15 alumnos/as para unha profesión con futuro, ademais de comprobar, cunha demostración práctica, todo o que están aprendendo.

Hoxe tocoulles facer de todo: cociñar, empratar, servir e explicar os distintos pratos que formaron parte do menú degustación: croquetas de lura na súa tinta, croquetas de polo ao curry, salpicón de peixe sapo e lagostino, empanadas caseiras, arroz caldoso con berberecho, peixe sapo, lagostino e alcachofa, láminas de polbo á feira con escuma de pataca, crema de cabaza con xamón e picatostes, carrilleiras de porco ibérico ao mencía acompañadas con pataca asada e, de sobremesa, dados de mazá asada con crema de requeixo e mini tortas variadas con chocolate. E a verdade é que trunfaron.

Ademais dos parabéns dos seus familiares, os alumnos e alumnas recibiron tamén os do alcalde, Evencio Ferrero, e o concelleiro de Formación e Emprego, Iván Andrade, que se achegaron ata as instalacións do Fórum Carballo xunto con outros membros do goberno municipal. Na xornada de portas abertas participaron, así mesmo, o persoal municipal do edificio e o obradoiro de emprego de carpintería ao completo.

Despois das vacacións de Nadal quedará aínda moito curso por diante para que o alumnado siga aprendendo e demostrando o que sabe a través de distintas iniciativas semellantes á de hoxe. O curso ten unha duración total de 1.135 horas, 320 das cales serán de prácticas en empresas.