Inicio Carballo ao día Novas As obras de construción do centro social...

As obras de construción do centro social de Bértoa arrincarán despois das Festas de San Xoán

O alcalde, Evencio Ferrero, asinou hoxe o contrato coa empresa adxudicataria, Desarrolla Obras y Servicios

Martes 18 de xuño do 2019

A sinatura do contrato realizouse na Alcaldía

A sinatura do contrato realizouse na Alcaldía

O alcalde de Carballo, Evencio Ferrero, asinou hoxe coa empresa Desarrolla Obras y Servicios o contrato correspondente ás obras de construción do centro social de Bértoa, no que investiremos 387.647,70 euros. Os traballos arrincarán despois das Festas de San Xoán e intentarase aproveitar o verán para avanzar o máximo posible na execución do proxecto deseñado polo arquitecto Carlos Seoane.

O centro social de Bértoa construirase nunha parcela municipal de 5.882 metros cadrados destinada a equipamento xunto á zona verde do polígono industrial. Será un edificio de 530 metros cadrados, divididos en dous volumes construídos baixo unha mesma cuberta, permitindo deste xeito xerar entre eles un espazo público protexido da choiva e do sol. Para acadar a integración na contorna utilizaranse materiais coma a pedra, a madeira e o formigón visto, que ao mesmo tempo destacan pola súa durabilidade.

Nun dos volumes crearase un auditorio de 107,8 metros cadrados, ademais de almacéns, aseo e hall. No outro, destinado á actividade diaria, haberá un aula de informática, un salón social, unha oficina, aseos e hall. As necesidades establecéronse segundo as peticións do movemento asociativo da parroquia. Ademais da zona cuberta entre ámbolos dos volumes, que xerará un espazo máis de uso comunitario, no exterior crearanse unha zona de barbacoa e un patio. Todo o edificio levantarase do chan sobre un zócalo de pedra, que permite, por unha banda, distanciarse da zona de máis tráfico, e, por outra, xerar asentos en forma de grada cara a zona arborada.

Con esta nova actuación abundamos na nosa intención de poñer a disposición da veciñanza espazos de encontro, reunión, formación e promoción cultural e deportiva.

Compartir: