Inicio Carballo ao día Hemeroteca O Concello de Carballo recupera un conxunto...

O Concello de Carballo recupera un conxunto etnográfico integrado por 12 muíños na parroquia de Lema

As 10 persoas perceptoras da RISGA que empezaron a traballar esta semana nas brigadas de medio ambiente e xardinería colaborarán na limpeza da senda que os une

Xoves 8 de novembro do 2018 Carballo ao día

A primeira limpeza realizada na primavera deixou os muíños á vista

A primeira limpeza realizada na primavera deixou os muíños á vista

Do mesmo xeito que no seu día redescubrimos a férveda de Ramil (Rus) tras unha espesa capa de maleza, a limpeza realizada a pasada primavera no río da Enxebra destapou outro tesouro que se atopaba agochado baixo as silvas na parroquia de Lema. As indicacións para chegar ata el déronas algúns veciños e veciñas que forman parte do Consello Parroquial que sabían da existencia dun conxunto de muíños, pero xa poucos se lembraban de que eran unha ducia.

“Desde que se parou de moer, e diso pode haber corenta anos ou máis, nunca máis se volveu e a maleza abusou deles”, sinala unha veciña. Só un se mantivo en funcionamento durante algún tempo máis, pero ata a pasada primavera permaneceron ocultos baixo a vexetación. O Concello de Carballo, a raíz da iniciativa do Consello Parroquial, realizou unha primeira limpeza que permitiu achegarse de novo aos muíños, pero agora pretende realizar un traballo máis minucioso que se completará co acondicionamento dunha senda con zahorra.

O traballo será coordinado pola brigada municipal de medio ambiente, á que veñen de incorporarse esta mesma semana 10 persoas perceptoras da RISGA con contratos de sete meses de duración. Entre os seus cometidos, segundo explica o concelleiro de Obras e Servizos, Luís Lamas, estará a limpeza de fontes, parques e espazos naturais en xeral, e un deles será esta nova ruta dos muíños da parroquia de Lema. Dez están situados no lugar de Centeás e dous, un deles en bo estado de conservación, no de Agramaior.

O goberno municipal volve a apostar pola recuperación dos elementos etnográficos máis significativos do noso concello e a súa posta en valor desde unha perspectiva sostible. Dado que os muíños son de propiedade privada, a actuación limitarase en principio á limpeza das construcións e da senda que os comunica para convertela nun novo espazo para o desfrute da cidadanía.



Galería

Compartir: