Instalados en distintos puntos do concello os 20 primeiros colectores dun novo sistema de recollida de aceites usados

Ademais de facilitar o depósito a particulares colocando os contedores na vía pública, o Concello de Carballo ofrece unha recollida individualizada a grandes consumidores

Mércores 18 de xullo do 2018

Esta semana comezaron a verse nas rúas os primeiros contedores dun novo proxecto de recollida de aceites de cociña usados que está a implantar o Concello de Carballo, a través de Carballo Limpo e a empresa concesionaria do servizo de recollida de residuos. Con este sistema, os colectores, que son antivandálicos, están situados na vía pública, o que permite que poidan ser utilizados os 365 días do ano e as 24 horas do día, facilitando deste xeito a participación da cidadanía. Os anteriores, que se atopaban no interior de distintos edificios públicos, serán eliminados.

Os emprazamentos concretos dos contedores son os seguintes: Razo (fronte ao Cordobés), Pedra do Sal (Noicela), Berdillo (xunto á igrexa), rúa Xosé Manuel Eirís esquina Avenida de Bértoa (xunto aos supermercados), Avenida do Ambulatorio, rúa Baixa (zona centro comercial), Álvaro Cunqueiro (fronte á piscina), Perú (esquina rúa Estrela), Coruña (cruce con Desiderio Varela), nas dúas entradas do Mercado Municipal pola Gran Vía e pola Praza do Concello, Gran Vía esquina Rosalía de Castro, Vila de Ordes no cruce con Vila de Noia, Avenida de Bergantiños esquina Vila de Laxe, Avenida da Milagrosa (rotonda), Avenida de Fisterra (zona da ponte de Isabel II), Praza da Cruz Vermella, Fórum Carballo e Rúa Papoula.

A recollida nos novos colectores vai dirixida aos fogares. As familias deben depositar o aceite de cociña usado en botellas de plástico reutilizadas e pechadas. Para grandes consumidores profesionais, desde o Concello de Carballo ofrécese a posibilidade de participar cun sistema de recollida individualizado. As empresas e/ou establecementos de restauración que teñan interese en participar poden poñerse en contacto con Carballo Limpo chamando ao 981 74 917 ou a través da web www.carballolimpo.com.