Inicio Carballo ao día Novas O Fórum Carballo acollerá o...

O Fórum Carballo acollerá o día 14 unha xuntanza de “Empoderamento da muller con cancro de mama”

O xefe de servizo de Oncoloxía Médica do Hospital Universitario da Coruña reuniuse con Evencio Ferrero para explicarlle a iniciativa

Venres 8 de xuño do 2018

Evencio Ferrero, Antón Aparicio e un membro do equipo técnico do programa

Evencio Ferrero, Antón Aparicio e un membro do equipo técnico do programa

Mulleres diagnosticadas de cancro de mama e membros de asociacións de doentes son os principais destinatarios da xornada de “Empoderamento da muller con cancro de mama” que se celebrará o vindeiro día 14 no Fórum. Carballo acollerá unha das catro xornadas programadas polo Servizo Galego de Saúde na área sanitaria da Coruña. Estes días as mulleres longo sobreviventes de cancro de mama dos concellos de Cerceda, Coristanco, Cabana, A Laracha, Laxe, Malpica, Ponteceso, Zas e Tordoia, ademais de Carballo, están a recibir os convites para participar. O obxectivo, tal como se lles explica na carta, é desenvolver unha proposta “axeitada e eficiente cara obxectivos innovadores, tales como a promoción da saúde, a prevención das condicións da saúde e limitacións inducidas polo cancro, e continuidade asistencial”.

O principal impulsor desta iniciativa é o doutor Antón Aparicio, xefe do servizo de Oncoloxía Médica do Hospital Universitario da Coruña, que quixo presentarlla ao alcalde de Carballo. Segundo comentou, trátase dunha acción dirixida a mulleres longo sobreviventes, é dicir, que están curadas e non reciben tratamento, porque soen quedar secuelas tanto físicas coma psíquicas. Neste sentido a xornada vai encamiñada a dar a coñecer ferramentas que faciliten unha saúde de calidade e a prevención desas secuelas, a fomentar a participación das doentes na política sanitaria e a propoñer iniciativas conxuntas que redunden na mellora do sistema público de saúde.

A xornada, que conta coa colaboración da Deputación da Coruña, desenvolverase ao longo de catro horas e contará coas intervencións de profesionais de diferentes especialidades da sanidade. O programa completo pode consultarse no folleto adxunto.

Descargas



Galería

Compartir: