A Concellaría de Obras e Servizos completa a campaña anual de limpeza das vías públicas

Despois da roza das pistas asfaltadas en todas as parroquias, as máquinas traballan agora no casco urbano e rematarán cos camiños de zahorra

Mércores 22 de novembro do 2017

A Concellaría de Obras e Servizos completa a campaña anual de roza das vías públicas, un labor que permite, ademais de mellorar a limpeza da nosa contorna, facilitar o mantemento da rede varia e aumentar a seguridade das persoas usuarias da mesma.

Despois da posta a punto das vías forestais, que o Concello de Carballo considera prioritaria para a prevención dos incendios forestais, nos últimos meses tamén se limparon os máis de 600 quilómetros de pistas asfaltadas que temos no noso concello, e estes días os dous tractores municipais traballan no casco urbano co obxectivo de deixar libres de maleza todos os terreos situados en zonas de paso de peóns. Os labores comezaron a semana pasada e prolongaranse ata finais de mes. A partir de aí, os operarios centraranse na limpeza doutros 600 quilómetros de vías de zahorra que temos en todo o territorio municipal.

Áreas de estacionamento gratuito

Ademais da limpeza da rede viaria, a Concellaría de Obras e Servizos traballa tamén estes días no acondicionamento dos aparcamentos de zahorra distribuídos por todo o casco urbano. As tarefas de posta a punto xa se levaron a cabo nas áreas de estacionamento das rúas Río e Pontevedra e na parte traseira do Pazo da Cultura, e proseguirán nos vindeiros días ata deixalas todas listas.