.jpg)
ABERTO O PRAZO DE INSCRICIÓN ATA O DÍA 7 ÁS 12 HORAS
O Espazo Xove de Carballo será unha das 12 sedes galegas do programa de emprendemento xuvenil FORMATour
A iniciativa, que arrancará o día 8, vai destinada a mozas e mozos de 18 a 30 anos de idade
Venres 3 de novembro do 2017
O Espazo Xove de Carballo será unha das 12 sedes galegas da iniciativa de emprendemento FORMATour, que se enmarca no proxecto Catalizador de oportunidades de emprego e emprendemento xove transfronteirizo (LIDERA) e que se desenvolve en España e Portugal no marco do programa europeo Interreg co obxectivo de “promover o desenvolvemento económico transfronteirizo a través das capacidades laborais e de emprendemento dos mozos e mozas do territorio”. Así o explican desde a Dirección Xeral de Xuventude, Participación e Voluntariado, que promove a actividade.
O proxecto FORMATour combina actividades formativas presenciais, tanto en grupo como individualizadas, e sesións de coaching. Entre unas e outras habilitarase unha ferramenta web con vídeo píldoras, exercicios, exemplos, infografías e exercicios de autoavaliación para complementar o traballo diario e mellorar o desenvolvemento persoal e as habilidades expostas.
En cada unha das 12 sedes crearase un grupo integrado por un mínimo de seis persoas e un máximo de doce. Os/as participantes deben ter idades comprendidas entre 18 e 30 anos. En Carballo a primeira sesión está programada para o día 8, e o prazo de inscrición estará aberto ata o día 7 ás 12 horas. Os/as interesados/as deben cumprimentar o formulario electrónico adxunto.
Ao remate da actividade cada asistente recibirá un diploma acreditativo de cumprir con este itinerario formativo. Ademais, escollerase a unha persoa por localidade para participar nunha aceleradora de desenvolvemento persoal a realizar durante o primeiro trimestre de 2018.