.jpg)
PREMIOS DA CULTURA GALEGA
O FIOT recibe o recoñecemento a 27 anos de traballo a prol das artes escénicas
O alcalde, o concelleiro de Cultura, o presidente da asociación Telón e Aparte e persoal vinculado ao festival asistiron ao acto de entrega en Montederramo
Sábado 12 de xaneiro do 2019
O FIOT (Festival Internacional Outono de Teatro) é o resultado do traballo colectivo, continuado, entregado e profesional de moita xente. Por iso, no acto de entrega do Premio da Cultura Galega ás Artes Escénicas, que recibiu este venres en Montederramo o festival carballés, non podían faltar as persoas que dende a parte técnica, creativa, de produción, e mesmo política, fixeron posible estes 27 anos de FIOT. O alcalde, Evencio Ferrero; o concelleiro de Cultura, Marcos Trigo; o presidente da Asociación Cultural Telón e Aparte, Alberto Sueiro; persoal da área de Cultura e representantes da parte técnica e artística asistiron á gala, presidida polo presidente da Xunta.
O FIOT compartiu galardón nin máis nin menos ca con Xosé María Álvarez Cáccamo, Luz Darriba, o grupo A Roda, o Festival de Cans, Antón Santamarina, a Asociación O Sorriso de Daniel e Ramón Villares. O xurado considerou que o FIOT, organizado pola Asociación Cultural Telón e Aparte e o Concello de Carballo, é “todo un referente na difusión e visualización das artes escénicas de Galicia”.
Desde o seu inicio, no ano 1992, “foi medrando de xeito exponencial tanto na calidade das programacións como na fidelización de público. Pola súa traxectoria, calidade da programación e a variedade das propostas de intermediación cultural que ofrece está recoñecido como un dos máis importantes festivais de Galicia, cun programa que vén ofrecendo unha trintena de obras e preto de 100 actividades paralelas”, segundo reflicte o fallo.
Grazas!